24 ліпеня ў БДУІР адбылося пасяджэнне Рэспубліканскага савета рэктараў устаноў вышэйшай адукацыі з удзелам Старшыні Савета Рэспублікі Нацыянальнага сходу Рэспублікі Беларусь Наталлі Іванаўны Качанавай і Міністра адукацыі Рэспублікі Беларусь Андрэя Іванавіча Іванца. У ліку дэлегатаў — рэктар Брэсцкага дзяржаўнага тэхнічнага ўніверсітэта Сяргей Антонавіч Каспяровіч.
Галоўнай тэмай стала абмеркаванне ходу ўступнай кампаніі.
У ходзе пасяджэння Наталля Іванаўна Качанава адзначыла, што ўдзел у савеце рэктараў для яе – не новая форма: «Працуючы і на папярэдняй пасадзе, і ў гэтай – я досыць часта з вамі сустракалася. Напэўна, у большай ступені я сустракаюся з рэктарамі, якія працуюць у Мінску. А сёння ў мяне ёсць магчымасць сустрэцца з рэктарскім корпусам усёй краіны. Будзем лічыць, што сёння – гэта інфармацыйная сустрэча з калектывам. Калектыў у дадзеным выпадку – рэктары ўсіх вышэйшых навучальных устаноў краіны, усе, хто сёння працуе з нашай моладдзю, рэалізоўвае задачы, якія стаяць перад вышэйшымі навучальнымі ўстановамі».
Па словах Старшыні Савета Рэспублікі, супрацоўніцтва з рэктарскім складам для сенатараў вельмі значнае: «Таму што мы актыўна працуем з законамі. Распрацоўваючы законапраекты, абмяркоўваючы іх, мы часам запрашаем і вас для ўдзелу ў экспертным савеце, які працуе ў Савеце Рэспублікі. Разумеем, што ўсе прымаемыя рашэнні павінны быць абсалютна выразна вывераныя і правільныя. Наша краіна – прававая дзяржава. Мы жывем па законах, а законы – распрацоўваюць, ратыфікуюць, ухваляюць члены Савета Рэспублікі».
Рэктарскі корпус абмеркаваў інфармацыю аб прыёме дакументаў ва УВА ад абітурыентаў, якія паступаюць за кошт рэспубліканскага бюджэту.
Як падкрэсліў старшыня Рэспубліканскага савета рэктараў, рэктар Беларускага дзяржаўнага ўніверсітэта інфарматыкі і радыёэлектронікі Вадзім Анатольевіч Богуш, Наталля Іванаўна Качанава некалькі гадоў таму прымала ўдзел у пасяджэнні савета рэктараў, на якім абмяркоўваліся стратэгічна важныя для вышэйшай адукацыі пытанні. «Гэта пытанні, звязаныя з рэалізацыяй кадравай палітыкі з улікам змены пакаленняў, якая адбываецца ў вышэйшых навучальных ўстановах. Ні для каго не сакрэт, што старая савецкая школа паступова сыходзіць, замяшчаецца моладдзю. І пытанні кадравай палітыкі з’яўляюцца ключавымі ў дзейнасці кожнага кіраўніка ўстановы вышэйшай адукацыі», — адзначыў ён.
«Акрамя таго, мы цяпер знаходзімся на вельмі важным этапе ўступнай кампаніі — прыём дакументаў. Гэта таксама вельмі адчувальная для нашага грамадства тэматыка. І, я думаю, што абмеркаванне любых актуальных пытанняў, звязаных з дзейнасцю вышэйшай школы, арганізацыяй уступнай кампаніі, працай рэктараў як кіраўнікоў, якія шмат у чым забяспечваюць і рэгіянальнае развіццё цэнтраў, — гэта вялікі плюс. Таму што прамыя зносіны з вышэйшым заканадаўчым органам у нашай краіне — гэта магчымасць і прыклад таго, як у нас абмяркоўваюцца і вырашаюцца праблемы», — дапоўніў У.А. Богуш.
