Брэсцкі дзяржаўны тэхнічны ўніверсітэт стаў месцам сустрэчы выдатнага аргенцінскага кампазітара, дырыжора і піяніста Марціна Палмеры і калектыву хору «Белая Вежа». Прыезд кампазітара сусветнай велічыні — гэта ўнікальная падзея для нашага універсітэта. Марцін Палмеры заслужыў сусветную вядомасць дзякуючы творам у галіне харавой музыкі, але найбольшую папулярнасць яму прынесла «Misa a Buenos Aires», вядомая як «Misatango».
Пляцоўкай для плённай узаемнай інтэграцыі ідэй кампазітара Марціна Палмеры і талентаў народнага акадэмічнага хору «Белая Вежа» стала актавая зала БрДТУ. У ходзе сустрэчы маэстра падзяліўся фактамі са сваёй біяграфіі і творчай дзейнасці, вопытам работы, абмеркаваў з удзельнікамі хору тонкасці выканальніцкага майстэрства.
Наш харавы калектыў у 2019 годзе ў праекце «Харавыя легенды» быў удастоены гонару выканаць некалькі частак твора «Misatango». Варта адзначыць, што традыцыйны маштабны праект «Харавыя легенды», накіраваны на папулярызацыю харавога мастацтва і творчае збліжэнне харыстаў розных пакаленняў, арганізоўваецца па ініцыятыве Беларускай асацыяцыі харавых дырыжораў і асабіста галоўнага дырыжора Дзяржаўнага камернага аркестра Рэспублікі Беларусь Яўгена Бушкова. Марцін Палмеры традыцыйна з’яўляецца ўдзельнікам гэтага грандыёзнага харавога мерапрыемства.
Кампазітар прадставіў на экране ў запісе фрагменты твора «Misatango» ў выкананні нашага харавога калектыву, акунуўшыся разам з удзельнікамі творчай сустрэчы ў прыемныя ўспаміны.
Найважнейшым момантам сустрэчы стаў майстар-клас, які правёў сам маэстра. Удзельнікі хору атрымалі каштоўны досвед працы з прызнаным музыкам, набылі новыя веды ў галіне інтэрпрэтацыі харавога твора і нюансаў кампазітарскага мыслення. Гэта несумненна ўзбагаціць іх далейшую музычную кар’еру. Наш харавы калектыў выканаў для кампазітара калядныя творы.
Калектыў народнага акадэмічнага хору «Белая Вежа» выказвае падзяку Марціну Палмеры за бясцэнны вопыт і ўклад у развіццё музычнага мастацтва ў моладзі Брэсцкага дзяржаўнага тэхнічнага ўніверсітэта.
