У Брэсцкім дзяржаўным тэхнічным універсітэце пры актыўным садзейнічанні Брэсцкага гарадскога савета ветэранаў адбыўся ўрок памяці, прысвечаны 105-годдзю Усесаюзнага Ленінскага камуністычнага саюза моладзі (УЛКСМ).
Першы сакратар Брэсцкага абласнога камітэта ГА «БРСМ» Юрый Сяргеевіч Сегенюк, звяртаючыся да ўдзельнікаў, адзначыў, што менавіта камсамольская моладзь была ў першых шэрагах абаронцаў Радзімы ў гады Вялікай Айчыннай вайны, а затым аднаўляла краіну з руін у пасляваенныя гады; менавіта камсамол асвойваў Усесаюзныя ўдарныя будоўлі і ўздымаў цалінныя землі. І зараз Беларускі рэспубліканскі саюз моладзі імкнецца адпавядаць высокаму званню пераемніка камсамола, знаходзячыся ў перадавых шэрагах па будаўніцтве незалежнай беларускай дзяржавы, свята шануючы традыцыі і пераемнасць пакаленняў.
Спікеры ўзнялі таксама тэму адраджэння дзейнасці студэнцкіх будаўнічых атрадаў у першыя гады незалежнасці Беларусі, арганізацыі зводных студэнцкіх атрадаў. Лепшыя традыцыі педагагічных і валанцёрскіх атрадаў, агітбрыгад, студэнцкіх фестываляў, працоўных і дабрачынных акцый працягвае сённяшняя моладзь.
Сувязь і пераемнасць пакаленняў — залог міру і працвітання нашай краіны.
